کوئٹہ ( خبردار نیوز ) ضلعی انتظامیہ نے شہر میں مقررہ نرخوں سے زائد پر دودھ فروخت کرنے والوں کے خلاف بھرپور کارروائی کرتے ہوئے 118 افراد کو گرفتار کر لیا ہے۔
یہ کریک ڈاؤن ڈپٹی کمشنر کوئٹہ کی خصوصی ہدایت پر خود ساختہ مہنگائی کے خاتمے کے لیے شروع کیا گیا ہے۔
انتظامیہ کے مطابق مہم کے دوران شہر کے مختلف علاقوں بشمول بروری روڈ، سبزل روڈ اور جناح ٹاؤن میں مجموعی طور پر 225 دکانوں کا معائنہ کیا گیا۔
کارروائی کے دوران گراں فروشی میں ملوث 118 افراد کو حراست میں لیا گیا جبکہ سنگین خلاف ورزیوں پر 46 دکانیں سیل کر دی گئی ہیں۔
ضلعی انتظامیہ کا کہنا ہے کہ اشیائے خوردونوش کی سرکاری نرخوں سے زائد پر فروخت کسی صورت برداشت نہیں کی جائے گی۔
انتظامیہ نے واضح کیا کہ عوام کو ریلیف فراہم کرنے کے لیے منافع خوروں کے خلاف سخت تادیبی کارروائیاں مستقبل میں بھی جاری رہیں گی تاکہ مصنوعی مہنگائی کا سدباب کیا جا سکے۔
