کوئٹہ (نمائندہ خصوصی) کوئٹہ میں ساتویں محرم الحرام کا شبیہ ذوالجناح کا روایتی ماتمی جلوس آج دوپہر 2 بجے امام بارگاہ کلاں پرنس روڈ سے برآمد ہوگا۔
جلوس روایتی راستوں سے گزرتا ہوا میکانگی روڈ پر امام بارگاہ ناصرالعزا پر اختتام پذیر ہوگا۔
انتظامیہ نے جلوس کے راستوں کو مکمل طور پر محفوظ بنانے کے لیے قناتیں لگا کر اور ٹرک کھڑے کر کے سیل کر دیا ہے،
جب کہ راستے میں آنے والی تمام دکانوں، مارکیٹوں اور پلازوں کو انجمن تاجران کے نمائندوں کی موجودگی میں بند کر دیا گیا ہے۔
سیکیورٹی انتظامات کے حوالے سے ایس ایس پی آپریشنز نے بتایا کہ جلوس کی حفاظت کے لیے پانچ ہزار کے قریب پولیس و دیگر قانون نافذ کرنے والے اداروں
کے اہلکار تعینات کیے جائیں گے۔
ذرائع کے مطابق، پاک فوج کی پانچ پلاٹونز کو بطور کیو آر ایف (Quick Reaction Force) اسٹینڈ بائی رکھا گیا ہے
تاکہ کسی بھی ہنگامی صورتِ حال میں فوری ردعمل دیا جا سکے۔
انتظامیہ نے شہریوں سے تعاون کی اپیل کرتے ہوئے کہا ہے کہ جلوس کے دوران سیکیورٹی اہلکاروں سے تعاون کریں اور مشکوک سرگرمیوں کی فوری اطلاع
متعلقہ حکام کو دیں۔
