چنئی: جنوبی بھارت سے تعلق رکھنے والی معروف تامل اداکارہ سباشینی بالا سبرامنیم کو چنئی میں کرائے کے ایک اپارٹمنٹ سے مردہ حالت میں برآمد کیا گیا۔
بھارتی میڈیا کے مطابق 36 سالہ اداکارہ ٹی وی سیریل “کیال” میں اپنے کردار کے باعث خاصی مقبول تھیں، اور ان کی اچانک موت نے شوبز حلقوں اور مداحوں کو گہرے صدمے میں مبتلا
کر دیا ہے۔
ابتدائی اطلاعات کے مطابق یہ واقعہ بظاہر خودکشی کا لگتا ہے، تاہم پولیس مختلف پہلوؤں سے تحقیقات کر رہی ہے۔ بتایا جاتا ہے کہ سباشینی کا تعلق سری لنکا سے تھا اور یہ واقعہ اتوار کی
رات پیش آیا۔
پولیس کے مطابق خودکشی سے قبل ان کی اپنے شوہر بیپن چندرن سے ویڈیو کال پر گھریلو معاملے پر تلخ کلامی ہوئی، جس کے دوران انہوں نے مبینہ طور پر یہ انتہائی قدم اٹھایا۔ شوہر نے
فوراً عمارت کے سیکیورٹی اسٹاف کو اطلاع دی، جس کے بعد پولیس کو بلایا گیا۔
پولیس موقع پر پہنچی اور سباشینی کو اسپتال منتقل کیا، مگر وہ جانبر نہ ہو سکیں۔ بیپن چندرن کا تعلق بنگلورو سے ہے اور دونوں کی شادی اپریل 2024 میں ہوئی تھی۔
اداکارہ نے چنئی میں شوٹنگ کے سلسلے میں اپریل کے آغاز میں یہ اپارٹمنٹ کرائے پر لیا تھا۔ وہ اپنے اسکرین نام “شاشوی بالا” سے بھی جانی جاتی تھیں اور ڈرامہ “کیال” میں منفی کردار
کے ذریعے شہرت حاصل کی۔ اس کے علاوہ وہ 2023 کی تامل فلم اور ایک ویب سیریز میں بھی کام کر چکی تھیں۔
