یمنی حوثیوں نے باب المندب کو بند کرنے کی وارننگ دے دی ہے۔

آبنائے ہرمز میں دوبارہ کشیدگی بڑھنے کے بعد یمن کے حوثی گروہ نے باب المندب بند کرنے کی دھمکی دے دی ہے۔

حوثی حکام کے بیان کے مطابق اگر ڈونلڈ ٹرمپ امن کی کوششوں میں رکاوٹ بنتے رہے تو وہ اس اہم آبی گزرگاہ کو بند کر سکتے ہیں۔ ان کا کہنا تھا کہ اگر باب المندب ایک بار بند کر دیا گیا تو اسے دوبارہ کھولنا کسی انسان کے بس میں نہیں ہوگا۔ انہوں نے ٹرمپ اور ان کے اتحادیوں کو خبردار کیا کہ وہ ان کے حقوق کا احترام کریں۔

یاد رہے کہ باب المندب خلیج عدن کو بحیرہ احمر سے جوڑنے والی ایک اہم سمندری راہداری ہے۔ ادھر ایران نے بھی گزشتہ روز آبنائے ہرمز کو دوبارہ بند کر دیا ہے، جس کے باعث تجارتی جہازوں کی آمد و رفت متاثر ہو گئی ہے۔

دوسری جانب پاسداران انقلاب کا کہنا ہے کہ جب تک امریکا ایران سے آنے جانے والے جہازوں کی نقل و حرکت بحال نہیں کرتا، آبنائے ہرمز پر سخت کنٹرول برقرار رہے گا۔