واشنگٹن ( مانیڑنگ ڈیسک ) امریکی صدر ڈونلڈ ٹرمپ نے ایران، پاکستان اور عالمی سیاست کے حوالے سے سنسنی خیز دعوے کرتے ہوئے کہا ہے کہ ایران اس وقت معاہدہ کرنے کے لیے
بری طرح بے تاب ہے اور اس کی معیشت مکمل طور پر تباہ ہو چکی ہے۔
ایک حالیہ بیان میں امریکی صدر نے کہا کہ ایران کے خلاف امریکی پابندیاں انتہائی کامیاب رہی ہیں جس کی وجہ سے وہ اپنا تیل نہیں بیچ پا رہا۔
انہوں نے دعویٰ کیا کہ گزشتہ جون میں کیے گئے حملوں نے ایران کی جوہری صلاحیت کو ختم کر دیا ہے اور اب ایران کی فضاؤں میں امریکی جہاز بلا روک ٹوک اڑ سکتے ہیں کیونکہ ان کا
دفاعی نظام ناکارہ ہو چکا ہے۔
صدر ٹرمپ نے مزید کہا کہ “ہم ایران کے ساتھ مذاکرات کر رہے ہیں اور وہ ہر تیسرے دن جنگ روکنے کی التجا کرتا ہے۔”
ٹرمپ نے انکشاف کیا کہ انہوں نے پاکستان اور بھارت کے درمیان ایک بہت بڑی جنگ رکوائی جس میں 11 طیارے گر چکے تھے۔
انہوں نے دعویٰ کیا کہ پاکستانی وزیر اعظم نے ان کی تعریف کرتے ہوئے کہا کہ صدر ٹرمپ نے 3 سے 5 کروڑ جانیں بچائیں۔ انہوں نے بتایا کہ 8 مختلف جنگیں رکوانے پر انہیں نوبل امن
انعام کے لیے بھی نامزد کیا گیا ہے۔
ایرانی خواتین کے حوالے سے بات کرتے ہوئے صدر ٹرمپ نے کہا کہ انہوں نے ایران کو فون کر کے 8 خواتین کی پھانسی رکوائی جن میں سے 4 کو رہا کر دیا گیا ہے۔
فٹ بال کے حوالے سے ایک سوال پر انہوں نے کہا کہ اگر فیفا صدر چاہتے ہیں تو ایران کو امریکہ میں میچ کھیلنے کی اجازت ہونی چاہیے۔ انہوں نے یہ بھی واضح کیا کہ امریکہ کو اب آبنائے
ہرمز کی ضرورت نہیں کیونکہ امریکہ کے پاس اپنا وافر تیل موجود ہے۔
