کراچی (اسٹاف رپورٹر) اسٹیٹ بینک آف پاکستان نے اعلامیہ جاری کرتے ہوئے بتایا ہے کہ رواں مالی سال کے دوران متوقع مالی وسائل کے حصول سے زرمبادلہ کے ذخائر میں نمایاں بہتری
آئی ہے،
اور مالی سال 2025 کے اختتام پر مرکزی بینک کے ذخائر 14.51 ارب ڈالر کی سطح پر پہنچ گئے ہیں۔
اسٹیٹ بینک کے مطابق، مالی سال 2025 کے دوران ذخائر میں مجموعی طور پر 5.12 ارب ڈالر کا اضافہ ریکارڈ کیا گیا۔
گزشتہ مالی سال کے اختتام پر، جون 2024 میں اسٹیٹ بینک کے ذخائر 9.39 ارب ڈالر تھے، جو ایک سال کے دوران بڑھ کر جون 2025 میں 14.51 ارب ڈالر ہو گئے۔
اسٹیٹ بینک نے اس پیشرفت کو بیرونی مالی معاونت، برآمدات میں بہتری، اور کرنٹ اکاؤنٹ میں توازن جیسے عوامل کا نتیجہ قرار دیا ہے۔
اعلامیے میں کہا گیا ہے کہ ذخائر میں اضافہ ملکی معیشت کے استحکام اور مالیاتی شعبے کی مضبوطی کی عکاسی کرتا ہے۔
مرکزی بینک نے امید ظاہر کی ہے کہ زرمبادلہ کے ذخائر میں یہ استحکام مستقبل قریب میں مالیاتی پالیسی کے تسلسل اور بیرونی ادائیگیوں کے دباؤ کو کم کرنے میں مددگار ثابت ہوگا۔
