کراچی (مانیٹرنگ ڈیسک): وفاقی وزیر ریلوے حنیف عباسی نے پاکستان اور ایران کے درمیان ریلوے رابطوں کی جلد بحالی کا بڑا اعلان کر دیا ہے۔
میڈیا سے گفتگو کرتے ہوئے انہوں نے کہا کہ پاکستان سے ایران تک ریلوے ٹریک کا آغاز جلد ہونے جا رہا ہے اور اس سلسلے کو صرف ایران تک محدود نہیں رکھا جائے گا بلکہ اسے مستقبل میں یورپ تک وسعت دی جائے گی۔
انفراسٹرکچر کی تفصیلات بتاتے ہوئے وفاقی وزیر نے کہا کہ روہڑی سے نوکنڈی تک کے 900 کلومیٹر اور نوکنڈی سے تفتان تک کے 87 کلومیٹر طویل ٹریک کو دوبارہ فعال کیا جا رہا ہے۔
انہوں نے ریلوے کی اہمیت پر زور دیتے ہوئے کہا کہ ملکی معیشت کے استحکام کے لیے ریلوے کا پہیہ چلنا ناگزیر ہے، کیونکہ ریلوے نہیں چلے گی تو پاکستان نہیں چلے گا۔
