راولپنڈی/بارکھان خبردار ڈیسک) بلوچستان کے ضلع بارکھان میں سیکیورٹی فورسز نے دہشتگردوں کے خلاف بڑی کارروائی کی ہے۔
پاک فوج کے شعبہ تعلقات عامہ (آئی ایس پی آر) کے مطابق ضلع بارکھان کے علاقے نوشم میں پاکستان آرمی اور ایف سی بلوچستان نے ‘فتنہ الہندوستان’ کے خلاف سینیٹائزیشن آپریشن کیا۔
آئی ایس پی آر کے مطابق آپریشن کے دوران دہشتگردوں اور سیکیورٹی فورسز کے درمیان شدید فائرنگ کا تبادلہ ہوا، جس کے نتیجے میں 7 دہشتگرد ہلاک کر دیے گئے۔
اس شدید جھڑپ کے دوران وطن کے پانچ بہادر سپوتوں نے بہادری سے لڑتے ہوئے جامِ شہادت نوش کیا۔
شہداء میں میجر توصیف احمد بھٹی، نائیک فدا حسین، سپاہی ذاکر حسین، سپاہی سہیل احمد اور سپاہی محمد ایاز شامل ہیں۔
ترجمان آئی ایس پی آر کا مزید کہنا ہے کہ علاقے میں بھارتی سرپرستی میں سرگرم ممکنہ دیگر دہشتگردوں کے مکمل خاتمے کے لیے کلیئرنس آپریشن تاحال جاری ہے، تاکہ علاقے کو شرپسندوں سے پاک کیا جا سکے۔
