کوئٹہ ٹرین پر دہشت گردی کے خلاف بلوچستان کے وکلاء آج صوبہ بھر میں عدالتی کارروائی کا مکمل بائیکاٹ

کوئٹہ ( خبردار نیوز ) کوئٹہ میں گذشتہ روز ریلوے ٹرین پر دہشت گردی کے المناک واقعے کے خلاف بلوچستان ہائیکورٹ بار ایسوسی ایشن کی کال پر آج صوبے بھر میں عدالتی کارروائی کا مکمل بائیکاٹ کیا گیا
کوئٹہ میں جعفر ایکسپریس سے منسلک ریلوے کوچ پر گذشتہ روز ہونے والے بم دھماکے کے خلاف وکلاء برادری سراپا احتجاج ہے۔
بلوچستان ہائیکورٹ بار ایسوسی ایشن کی اپیل پر آج وکلاء اعلیٰ اور ماتحت عدلیہ میں پیش نہیں ہو رہے،
جس کے باعث عدالتوں میں قانونی امور ٹھپ ہو کر رہ گئے ہیں، جبکہ سوگ میں بار رومز پر سیاہ جھنڈے بھی لہرائے گئے ہیں۔
صدر ہائیکورٹ بار کے صدر میر عطاء اللہ لانگو کا کہنا ہے کہ ریلوے ٹرین پر معصوم شہریوں کو نشانہ بنانا کھلی انسانیت دشمنی اور ریاستی رٹ کو چیلنج کرنے کے مترادف ہے۔
انہوں نے حکومت اور قانون نافذ کرنے والے اداروں سے مطالبہ کیا ہے کہ اس بزدلانہ کارروائی میں ملوث دہشت گردوں، ان کے سہولت کاروں اور منصوبہ سازوں کو فوری طور پر گرفتار کر کے قانون کے کٹہرے میں لایا جائے اور انہیں عبرتناک سزا دی جائے۔
دوسری جانب عدالتوں میں وکلاء کی عدم حاضری کے باعث سائلین کو شدید مشکلات کا سامنا کرنا پڑا –