(روزنامہ خبردار کوئٹہ ) امریکی صدر ڈونلڈ ٹرمپ نے سوشل میڈیا پر جاری اپنے بیان میں کہا ہے کہ ایران کے ساتھ مذاکرات مثبت سمت میں جاری ہیں اور امید ظاہر کی کہ اس حوالے سے اہم پیش رفت سامنے آئے گی۔
ٹرمپ کے مطابق ایران کے ساتھ ممکنہ معاہدہ مؤثر اور قابلِ عمل ہونا چاہیے، ورنہ ایسے معاہدے کی کوئی اہمیت نہیں ہوگی۔ انہوں نے خبردار کیا کہ اگر مذاکرات کامیاب نہ ہوئے تو سخت اقدامات بھی زیرِ غور آ سکتے ہیں۔
انہوں نے سابق امریکی انتظامیہ کے ایران جوہری معاہدے پر تنقید کرتے ہوئے کہا کہ اوباما دور میں ہونے والے معاہدے نے ایران کو جوہری ہتھیاروں کے حصول کی راہ فراہم کی۔
امریکی صدر نے مزید بتایا کہ ایران سے متعلق امور پر متعدد عرب رہنماؤں سے تفصیلی مشاورت کی گئی، جبکہ پاکستان، ترکیہ، مصر، اردن اور بحرین سمیت کئی ممالک کے ساتھ بھی رابطے کیے گئے۔
ٹرمپ نے کہا کہ اگر ایران کے ساتھ معاہدہ کامیاب رہا تو خطے میں امن، استحکام اور تعاون کی نئی فضا قائم ہو سکتی ہے۔
انہوں نے ابراہم معاہدے کو عالمی سطح پر ایک اہم سفارتی کامیابی قرار دیتے ہوئے کہا کہ یہ مشرقِ وسطیٰ میں معاشی اور سفارتی استحکام کو فروغ دے سکتا ہے۔ ساتھ ہی انہوں نے سعودی عرب اور قطر پر زور دیا کہ وہ بھی ابراہم معاہدوں میں شمولیت پر غور کریں۔
