واشنگٹن (مانیٹرنگ ڈیسک)امریکی صدر ڈونلڈ ٹرمپ نے ایران کے حوالے سے انتہائی سخت اور واضح بیان جاری کرتے ہوئے کہا ہے کہ ایران کبھی بھی ایٹمی ہتھیار حاصل نہیں کر سکے گا۔
ان کا کہنا تھا کہ امریکی انتظامیہ دہائیوں پرانے اس مسئلے کا حتمی اور پائیدار حل نکال رہی ہے جو خود ایرانی حکومت کا پیدا کردہ ہے۔
واشنگٹن میں ذرائع ابلاغ سے گفتگو اور اپنے بیانات میں صدر ٹرمپ نے ایرانی سفارت کاری پر سخت تنقید کرتے ہوئے کہا کہ ایرانی حکام خود ہم سے ملاقات کی درخواستیں کرتے ہیں لیکن جب بات چیت کا وقت آتا ہے تو آگے سے مکر جاتے ہیں۔
صدر نے انکشاف کیا کہ ایران یہ تاثر دینے کی کوشش کر رہا ہے کہ وہ صرف عمان کے ذریعے ہی تمام معاملات اور مذاکرات طے کر رہا ہے،
تاہم حقیقت یہ ہے کہ کسی معقول معاہدے تک پہنچنے یا شکست تسلیم کیے بغیر ایران کو کچھ حاصل نہیں ہونے والا۔
خطے کی صورتحال اور بحری راستوں کا ذکر کرتے ہوئے صدر ڈونلڈ ٹرمپ نے دعویٰ کیا کہ امریکی بحریہ اس وقت آبنائے ہرمز (Strait of Hormuz) اور اطراف کے تزویراتی بحری راستوں پر مکمل کنٹرول رکھتی ہے۔ انہوں نے سخت تنبیہ کرتے ہوئے کہا کہ امریکی رضامندی اور اجازت کے بغیر کوئی چیز یا رسد ایران تک نہیں پہنچ سکتی۔
صدر ٹرمپ نے اپنے خطاب کا اختتام ایران کے ایٹمی پروگرام پر واضح اور دوٹوک پیغام کے ساتھ کیا۔
ان کا کہنا تھا کہ امریکہ کسی بھی قیمت پر تہران کو ایٹمی طاقت بننے کی اجازت نہیں دے گا۔
امریکی صدر کے اس بیان کے بعد مشرقِ وسطیٰ میں کشیدگی اور سفارتی تحرک میں مزید اضافے کا امکان ظاہر کیا جا رہا ہے۔
