پاکستانی نژاد کھلاڑی تاریخ رقم کرنے کے قریب ہ

بغداد ( اسپورٹس ڈیسک )‌عراقی فٹبالر زیدان اقبال فیفا ورلڈ کپ میں شرکت کرنے والے پہلے پاکستانی نژاد کھلاڑی بننے کے دہانے پر ہیں، جو عراقی اور پاکستانی فٹبال کمیونٹیز کے لیے ایک تاریخی سنگِ میل ہوگا۔
غیر ملکی خبر رساں ادارے کے مطابق 21 سالہ مڈفیلڈر انگلینڈ میں پیدا ہوئے اور انہوں نے بین الاقوامی سطح پر اپنی والدہ کے وطن عراق کی نمائندگی کا انتخاب کیا، جبکہ ان کے والد کا تعلق پاکستان سے ہے۔
زیدان اقبال مانچسٹر یونائیٹڈ کی یوتھ اکیڈمی سے ابھرے اور یورپی مقابلوں میں کلب کی سینئر ٹیم کے لیے کھیلنے والے پہلے برطانوی جنوبی ایشیائی فٹبالر بھی بنے۔ ان کی ممکنہ ورلڈ کپ شرکت ایسے وقت میں سامنے آ رہی ہے جب عراق کئی دہائیوں بعد عالمی فٹبال کے سب سے بڑے ایونٹ میں واپسی کے قریب ہے، جسے عراقی فٹبال کے لیے ایک بڑی کامیابی قرار دیا جا رہا ہے۔