پشاور ( خبردارڈیسک ) خیبرپختونخوا کے ضلع لکی مروت میں دہشت گردی کا ایک واقعہ پیش آیا، جہاں تھانہ شہبازخیل کی حدود میں پولیس موبائل کو بارودی مواد کے ذریعے نشانہ بنایا گیا۔
پولیس کے مطابق دھماکے کے نتیجے میں ایک اے ایس آئی سمیت پانچ اہلکار زخمی ہوگئے، جنہیں فوری طور پر اسپتال منتقل کر دیا گیا۔
ترجمان پولیس کا کہنا ہے کہ دھماکا اس وقت ہوا جب پولیس موبائل معمول کی گشت پر تھی۔
ابتدائی تحقیقات سے معلوم ہوا ہے کہ بارودی مواد ایک موٹر سائیکل میں نصب کیا گیا تھا، جسے قریب لا کر دھماکے سے اڑا دیا گیا۔
زخمیوں میں اے ایس آئی جمال الدین، کانسٹیبل عارف اور ڈرائیور میر حسن شامل ہیں، جبکہ ایک راہگیر بھی دھماکے کی زد میں آکر زخمی ہوا۔
تمام زخمیوں کو فوری طبی امداد کے لیے قریبی اسپتال منتقل کیا گیا ہے، جبکہ علاقے میں سیکیورٹی سخت کر کے مزید تحقیقات جاری ہیں۔
