لاس اینجلس (ویب ڈیسک)
فیفا ورلڈ کپ کے حوالے سے ایک اہم پیش رفت سامنے آئی ہے جہاں ایرانی فٹبال ٹیم ٹورنامنٹ کے دوران میکسیکو میں قیام کرے گی اور اپنے میچز کھیلنے کے لیے امریکا کا سفر کرے گی۔
اس بات کا انکشاف میکسیکو کے صدر نے میڈیا سے گفتگو کرتے ہوئے کیا۔
میکسیکن صدر کے مطابق، امریکی حکام کی جانب سے ایرانی فٹبال ٹیم کو امریکا میں قیام کی اجازت دینے سے انکار کر دیا گیا تھا۔
امریکا کے اس فیصلے کے بعد فٹبال کی عالمی گورننگ باڈی (فیفا) نے فوری طور پر میکسیکو سے رابطہ کیا اور ایرانی ٹیم کی میزبانی کی درخواست کی۔
میکسیکن صدر نے واضح کیا کہ میکسیکو کی جانب سے ایرانی ٹیم کو اپنے ملک میں قیام کی اجازت دینے میں کوئی رکاوٹ نہیں ہے اور وہ ٹیم کو خوش آمدید کہنے کے لیے تیار ہیں۔
اس انتظام کے تحت ایرانی ٹیم ورلڈ کپ کے دوران میکسیکو میں ہی ڈیرے ڈالے گی اور جس دن ان کا میچ ہوگا، وہ صرف میچ کھیلنے کے لیے امریکا کا سفر کرے گی۔
دوسری جانب، بین الاقوامی خبر رساں ادارے ‘رائٹرز’ کے مطابق، ایران ورلڈ کپ کے گروپ مرحلے میں اپنے تینوں میچز امریکی شہروں لاس اینجلس اور سیئٹل میں کھیلے گا۔
ایرانی ٹیم میگا ایونٹ میں اپنی مہم کا باقاعدہ آغاز 16 جون کو نیوزی لینڈ کے خلاف کھیلے جانے والے میچ سے کرے گی۔
سیاسی کشیدگی کے باوجود فیفا اور میکسیکو کے اس مشترکہ فارمولے کے تحت ایرانی ٹیم کی ورلڈ کپ میں شرکت کو یقینی بنا لیا گیا ہے،
جو کھیلوں کی دنیا میں ایک غیر معمولی صورتحال ہے۔
