وفاق نے بلوچستان کو بجٹ میں مکمل نظرانداز کیا، بلوچستان اسمبلی میں ارکان کا اظہارِ برہمگی

کوئٹہ (اسٹاف رپورٹر)بلوچستان اسمبلی کا اہم ترین اجلاس ڈپٹی اسپیکر غزالہ گولہ کی صدارت میں مقررہ وقت سے 30 منٹ کی تاخیر سے شروع ہوا۔
اجلاس کا ایجنڈا مالی سال 27-2026 کے صوبائی بجٹ پر عام بحث اور رواں مالی سال کے بجٹ کے ضمنی مطالباتِ زر پر رائے شماری تھا۔ بجٹ پر بحث کا آغاز ہوتے ہی ایوان میں وفاق کے رویے اور صوبائی مسائل پر اراکینِ اسمبلی کی جانب سے شدید ردعمل سامنے آیا۔
​وفاق فنڈز نہیں دیتا، اسکیمیں ادھوری ہیں: فضل قادر مندوخیل
​بجٹ بحث میں حصہ لیتے ہوئے رکنِ اسمبلی فضل قادر مندوخیل نے وفاقی حکومت کو سخت تنقید کا نشانہ بنایا۔ انہوں نے کہا کہ بلوچستان کے اپنے وسائل انتہائی محدود ہیں، اور اوپر سے وفاق بھی صوبے کو اس کے جائز فنڈز فراہم نہیں کر رہا۔ فنڈز کی عدم دستیابی کے باعث صوبے کا ترقیاتی عمل شدید متاثر ہو رہا ہے اور ہماری 25 فیصد ترقیاتی اسکیمات اب بھی ادھوری پڑی ہیں۔ انہوں نے علاقائی مسائل کا ذکر کرتے ہوئے کہا کہ ژوب میں پبلک ہیلتھ کے شعبے میں سہولیات کا شدید فقدان ہے جس کی وجہ سے عوام کو سخت مشکلات کا سامنا ہے۔
​ہم خیرات نہیں، برابری چاہتے ہیں: کلثوم نیاز
نیشنل پارٹی کی ​رکنِ اسمبلی کلثوم نیاز نے بحث میں حصہ لیتے ہوئے کہا کہ وفاقی بجٹ میں بلوچستان کو مکمل طور پر نظرانداز کیا گیا ہے جو کہ صوبے کے عوام کے ساتھ سراسر ناانصافی ہے۔ انہوں نے گلے شکوے کا اظہار کرتے ہوئے کہا کہ “جب بھی بلوچستان کے وسائل کی بات آتی ہے تو حکمرانوں کو فوراً بلوچستان یاد آ جاتا ہے، لیکن حقوق دینے کی باری آئے تو آنکھیں پھیر لی جاتی ہیں”۔ انہوں نے واضح کیا کہ بلوچستان وفاق سے کوئی خیرات نہیں مانگ رہا، بلکہ ہم برابری کی بنیاد پر اپنا حق چاہتے ہیں۔
​تعلیم اور صحت بجٹ کی اولین ترجیح
​صوبائی بجٹ کے مثبت پہلوؤں پر روشنی ڈالتے ہوئے کلثوم نیاز نے بتایا کہ موجودہ صوبائی بجٹ میں ہیلتھ (صحت) اور ایجوکیشن (تعلیم) کے شعبوں کے لیے خطیر رقم مختص کی گئی ہے جو کہ ایک خوش آئند قدم ہے۔ انہوں نے اس بات پر زور دیا کہ اس وقت کوالٹی ایجوکیشن (معیاری تعلیم) صوبے کی سب سے بڑی اور اہم ترین ضرورت ہے، جس پر کسی صورت سمجھوتہ نہیں کیا جا سکتا۔
​ایوان میں بجٹ پر عام بحث کا سلسلہ جاری ہے جبکہ اجلاس کے دوران رواں سال کے بجٹ کے ضمنی مطالباتِ زر پر رائے شماری بھی عمل میں لائی جائے گی۔