کراچی (خبر نگار)صدرِ مملکت آصف علی زرداری سے بلاول ہاؤس کراچی میں بلوچستان کے صوبائی وزراء کے ایک اعلیٰ سطحی وفد نے اہم ملاقات کی، جس میں صوبے میں امن و امان کی مجموعی صورتحال، جاری ترقیاتی منصوبوں اور عوامی فلاح و بہبود کے امور پر تفصیلی تبادلہ خیال کیا گیا۔
صدرِ مملکت نے بلوچستان میں جاری تمام ترقیاتی منصوبوں پر پیش رفت کو تیز کرنے کی سخت ہدایت کرتے ہوئے زور دیا کہ صوبے کی ترقی کے عمل میں کوئی رکاوٹ نہیں آنی چاہیے۔
حکومت کی ترجیحات: آصف علی زرداری نے کہا کہ بلوچستان کے عوام کو تمام بنیادی سہولیات کی فراہمی اور صوبے میں پائیدار ترقی کو یقینی بنانا موجودہ حکومت کی اولین ترجیحات میں شامل ہے۔
انہوں نے ہدایت کی کہ بلوچستان میں امن و امان کی صورتحال کو بہتر بنانے، معاشی سرگرمیوں کو فروغ دینے اور عوامی فلاح کے لیے تمام متعلقہ ادارے آپس میں مکمل ربط اور ہم آہنگی کے ساتھ کام کریں۔
