کراچی (اکنامک رپورٹر) پاکستان اسٹاک مارکیٹ نے آج کاروبار کے دوران تاریخ کے تمام پچھلے ریکارڈ پاش پاش کر دیے ہیں۔ 100 انڈیکس میں ایک ہی دن میں 7 ہزار 461 پوائنٹس کا غیر
معمولی اور زبردست اضافہ ریکارڈ کیا گیا، جس کے بعد انڈیکس 1 لاکھ 56 ہزار 204 پوائنٹس کی بلند ترین سطح پر بند ہوا۔
آج صبح کاروبار کے آغاز سے ہی سرمایہ کاروں میں زبردست جوش و خروش دیکھا گیا اور ہر شعبے میں بڑے پیمانے پر خریداری کی گئی۔
مارکیٹ میں تیزی کی لہر اس قدر شدید تھی کہ قوانین کے تحت ‘مارکیٹ ہالٹ’ نافذ کرنا پڑا اور اسٹاک مارکیٹ کو ایک گھنٹے کے لیے بند کر دیا گیا تاکہ صورتحال کو متوازن رکھا جا سکے۔
معاشی ماہرین کا کہنا ہے کہ اسٹاک مارکیٹ میں آنے والا یہ ‘تیزی کا طوفان’ ملکی معیشت پر سرمایہ کاروں کے بڑھتے ہوئے اعتماد کا عکاس ہے۔
ایک ہی دن میں اتنے بڑے پوائنٹس کا اضافہ پاکستان کی مالیاتی تاریخ کا ایک غیر معمولی واقعہ ہے جس نے عالمی سطح پر بھی پاکستان کی مارکیٹ کی توجہ حاصل کر لی ہے۔
