گوادر پورٹ پر بین الاقوامی ٹرانس شپمنٹ سرگرمیوں میں ایک اور اہم پیش رفت

گوادر (خبردار نیوز) گوادر پورٹ پر بین الاقوامی ٹرانس شپمنٹ سرگرمیوں میں ایک اور اہم پیش رفت سامنے آئی ہے،
جہاں ٹرانس شپمنٹ کارگو لے کر آنے والا بحری جہاز MV YUAN HANG WEI Y گوادر پورٹ پر لنگر انداز ہوگیا ہے۔
گوادر پورٹ پر عالمی بحری سرگرمیوں میں حالیہ دنوں میں مسلسل اضافہ دیکھنے میں آ رہا ہے۔
ٹرانس شپمنٹ کارگو لے کر آنے والا بحری جہاز MV YUAN HANG WEI YE گوادر پورٹ پہنچ گیا، جو ابوظہبی اور کویت کے لیے مختص کارگو یہاں اتارے گا۔
اس پیش رفت کو گوادر پورٹ کی بڑھتی ہوئی تجارتی اور ٹرانزٹ اہمیت کا مظہر قرار دیا جا رہا ہے۔
وفاقی وزیر برائے بحری امور جنید انوار چوہدری نے اس موقع پر کہا کہ حکومت گوادر پورٹ کو خطے کا اہم تجارتی اور ٹرانس شپمنٹ حب بنانے کے لیے عملی اقدامات کر رہی ہے۔
انہوں نے کہا کہ گوادر پورٹ پر عالمی بحری سرگرمیوں میں اضافہ ملکی معیشت، ٹرانزٹ ٹریڈ اور سرمایہ کاری کے فروغ کے لیے مثبت اشارہ ہے۔
چیئرمین گوادر پورٹ نورالحق بلوچ کے مطابق حالیہ مراعاتی پالیسیوں اور پورٹ چارجز میں کمی کے بعد عالمی شپنگ کمپنیوں کی دلچسپی میں نمایاں اضافہ ہوا ہے۔انہوں نے کہا کہ گوادر پورٹ کو جدید تقاضوں سے ہم آہنگ بنا کر خطے کی اہم تجارتی راہداری میں تبدیل کیا جا رہا ہے۔
چیئرمین گوادر پورٹ کا مزید کہنا تھا کہ گوادر پورٹ مستقبل میں پاکستان، وسطی ایشیا، خلیجی ممالک اور عالمی تجارت کے لیے ایک مؤثر گیٹ وے ثابت ہوگا۔