کراچی ( ویب ڈیسک ) محکمہ انسدادِ دہشت گردی (سی ٹی ڈی) کراچی اور ایک وفاقی حساس ادارے نے شہر کے دو مختلف مقامات پر مشترکہ کارروائیاں کرتے ہوئے کالعدم تنظیموں سے تعلق رکھنے والے 3 مبینہ دہشت گردوں کو گرفتار کر لیا ہے۔
ترجمان سی ٹی ڈی کے مطابق ملزمان کے قبضے سے دستی بم اور ایک تیار شدہ آئی ای ڈی بھی برآمد ہوئی ہے۔
پہلی کارروائی (بی ایل اے): پہلی کارروائی میں کالعدم تنظیم بلوچ لبریشن آرمی (BLA) سے تعلق رکھنے والے 2 ملزمان کو گرفتار کیا گیا، جن کی شناخت ساجد یوسف اور شوکت علی عرف شوکی کے نام سے ہوئی۔
ابتدائی تفتیش کے مطابق یہ ملزمان اپنے کمانڈر کے مسلسل رابطے میں تھے اور کراچی کے حساس مقامات اور قانون نافذ کرنے والے اداروں کے دفاتر کو نشانہ بنانے کی خطرناک منصوبہ بندی کر رہے تھے۔
دوسری کارروائی (ٹی ٹی پی): دوسری کارروائی میں کالعدم تحریک طالبان پاکستان (TTP) سے تعلق کے شبہے میں ایک ملزم داد محمد عرف عادل کو دبوچا گیا، جو شہر میں حساس مقامات اور قانون نافذ کرنے والے اداروں کو نشانہ بنانے کے درپے تھا۔
گرفتار ملزمان کے قبضے سے 2 دستی بم اور ایک مکمل تیار شدہ دیسی ساختہ بم (آئی ای ڈی) برآمد کیا گیا۔
مقدمات اور تفتیش: ملزمان کے خلاف تھانہ سی ٹی ڈی کراچی میں انسدادِ دہشت گردی ایکٹ اور دھماکا خیز مواد (ایکسپلوسیو سبسٹینسز ایکٹ) کے تحت 3 مقدمات درج کر لیے گئے ہیں۔
سی حکام کے مطابق، گرفتار ملزمان کے دیگر مفرور ساتھیوں، سہولت کاروں اور مالی معاونین کی گرفتاری اور نشاندہی کے لیے مزید تفتیش اور چھاپے مارے جا رہے ہیں تاکہ کسی بھی بڑے سانحے کو روکا جا سکے۔
