اسلام آباد( مانیٹرنگ ڈیسک ) سانحۂ کارساز کے 19 برس مکمل ہونے پر صدرِ مملکت آصف علی زرداری نے سانحے کے شہداء کو زبردست خراجِ عقیدت پیش کرتے ہوئے کہا ہے کہ سانحۂ کارساز کے شہداء کی قربانیاں پاکستان کی قومی تاریخ کا ایک روشن باب ہیں۔
جمہوریت اور امن کے لیے قربانیاں مشعلِ راہ ہیں
صدر مملکت نے اس عزم کا اعادہ کیا کہ شہید محترمہ بینظیر بھٹو اپنی جان کو لاحق شدید خطرات کے باوجود ثابت قدم رہیں، اور ان کی جرأت و قربانی جمہوریت، امن اور انصاف کے تمام علمبرداروں کے لیے ہمیشہ مشعلِ راہ رہے گی۔
انہوں نے کہا کہ آئین کی بالادستی، عوام کی حکمرانی اور جمہوری اقدار کا تحفظ ہی دراصل سانحۂ کارساز کے شہداء کی قربانیوں کا حقیقی تقاضا ہے۔
دہشت گردی کے خلاف عزم مزید مضبوط ہوتا ہے
صدر آصف علی زرداری کا کہنا تھا کہ سانحۂ کارساز کے شہداء کی لازوال قربانیاں ملک سے دہشت گردی اور انتہا پسندی کے مکمل خاتمے کے ہمارے عزم کو مزید مضبوط کرتی ہیں۔
یہ قربانیاں آنے والی نسلوں کے لیے ایک پُرامن، جمہوری اور خوشحال پاکستان کی تعمیر کے عزم کا ہمیشہ سرچشمہ رہیں گی۔
