کوئٹہ (نیوز ڈیسک): بلوچستان کے صوبائی وزیر داخلہ ضیاء اللہ لانگو نے کہا ہے کہ خطہ اس وقت ایک بڑی جنگ کی لپیٹ میں ہے اور پاکستان کو ایک سوچی سمجھی سازش کے تحت عدم استحکام کا شکار رکھا گیا ہے۔
کوئٹہ میں میڈیا سے گفتگو کرتے ہوئے انہوں نے دو ٹوک الفاظ میں واضح کیا کہ پاکستان ایک ذمہ دار ایٹمی ملک ہے اور یہ حقیقت ہم عالمی سطح پر باور کرا چکے ہیں۔
ضیاء لانگو نے بھارت کے مذموم عزائم کو بے نقاب کرتے ہوئے انکشاف کیا کہ بھارت کے 18 قونصل خانے پاکستان کے خلاف سرگرمیوں میں مصروف ہیں۔ انہوں نے کہا:بھارت اپنی خفت مٹانے میں ناکام رہا ہے، خاص طور پر مئی 2025 کی شکست کو بھارت اب تک بھلا نہیں پا رہا اور اسی بوکھلاہٹ میں پاکستان کے خلاف سازشیں کر رہا ہے۔”
افغانستان کی صورتحال پر گفتگو کرتے ہوئے صوبائی وزیر نے افسوس کا اظہار کیا کہ افغان سرزمین بار بار پاکستان کے خلاف استعمال ہو رہی ہے۔
انہوں نے کہا کہ افغانستان اپنی ذمہ داری پوری کرنے کے بجائے سازشوں کا ذریعہ بنا ہوا ہے۔ انہوں نے واضح کیا کہ پاکستان، افغانستان کے ساتھ جنگ نہیں چاہتا۔ تاہم ایک پرامن اور تعلیم یافتہ افغانستان کے اثرات پاکستان پر بھی مثبت ہوں گے۔
ان سوال کے جواب میں صوبائی وزیر نے فورسز، انٹیلی جنس اداروں، پولیس اور عوام کی ہزاروں شہادتوں کو خراجِ عقیدت پیش کرتے ہوئے کہا کہ ہمارے اداروں نے ہمیشہ ملکی مفاد کو مقدم رکھا ہے۔
انہوں نے عزم کا اظہار کیا کہ پاکستان کے عوام اور سرزمین ہمیں جان سے پیاری ہے اور اس کا دفاع ہر قیمت پر کیا جائے گا۔
