کوئٹہ (نیوز ڈیسک)آئی جی پولیس بلوچستان اور ترجمان
بلوچستان پولیس کی جانب سے جاری کردہ حالیہ اعلامیے
میں پولیس کلچر کی تبدیلی اور عوامی مسائل کے فوری حل
کے لیے انقلابی اقدامات کا اعلان کیا گیا ہے۔
ترجمان بلوچستان پولیس کے مطابق، شہریوں کی جانب سے
موصول ہونے والی شکایات پر سخت نوٹس لیتے ہوئے پولیس
اہلکاروں کی جانب سے اختیارات سے تجاوز اور بیجا استعمال
کو روکنے کے لیے مانیٹرنگ شروع کر دی گئی ہے۔
واضح کیا گیا ہے کہ شکایات کا فوری نوٹس لیتے ہوئے متعلقہ
اہلکار کے خلاف قانون کے مطابق سخت تادیبی کارروائی عمل
میں لائی جائے گی۔آئی جی پولیس بلوچستان نے تمام تھانوں کو پابند کیا ہے کہ وہ شہریوں کی شکایات کا بروقت ازالہ کریں۔
ایف آئی آر (FIR) فوری اندراج کو ہر صورت ممکن بنائیں۔
عام شہریوں کے مسائل کے سدباب کے لیے کوئی کسر اٹھا نہ
رکھی جائے
عوام کی سہولت کے لیے کوئٹہ سمیت تمام اضلاع کے تھانوں کے باہر ٹول فری نمبرز اور بلوچستان پولیس کے ذاتی واٹس ایپ نمبرز آویزاں کر دیے گئے ہیں۔
ان اقدامات کا مقصد شہریوں اور پولیس کے اعلیٰ حکام کے درمیان براہ راست رابطہ قائم کرنا ہے
تاکہ کسی بھی شکایت کی صورت میں شہری فوری رجوع کر سکیں۔
ترجمان نے مزید بتایا کہ سینٹرل پولیس آفس کوئٹہ میں ایک خصوصی سیل قائم کر دیا گیا ہے
جہاں درج کی جانے والی شکایات پر کارروائی کے دوران شکایت کنندہ کا نام صیغہ راز میں رکھا جاتا ہے۔ شہری کسی بھی انتقامی کارروائی کے خوف کے بغیر اپنی شکایات درج کروا سکتے ہیں۔”
بلوچستان پولیس کے ان اقدامات کو عوامی حلقوں میں بڑے پیمانے پر سراہا جا رہا ہے، جس سے پولیس اور عوام کے درمیان اعتماد کا رشتہ مضبوط ہونے کی توقع ہے۔
