کراچی (مانیٹرنگ ڈیسک) گوادر چیمبر آف کامرس اینڈ انڈسٹری کے ایک اعلیٰ سطحی وفد نے جام خالد کی قیادت میں گورنر سندھ سے ملاقات کی۔
ملاقات میں مکران ڈویژن سے کراچی آنے والے مسافروں کو درپیش مشکلات اور تجارتی گاڑیوں کی آمد و رفت میں حائل رکاوٹوں پر تفصیلی تبادلہ خیال کیا گیا۔
وفد میں میر امداد رند اور چیمبر کے دیگر سرکردہ اراکین شامل تھے۔ وفد نے گورنر سندھ کو آگاہ کیا کہ مکران سے کراچی آنے والے عام مسافروں اور کاروباری برادری کو مختلف مقامات پر
سخت دشواریوں کا سامنا کرنا پڑ رہا ہے۔
وفد نے خاص طور پر کراچی کے داخلی راستوں اور شہر کے اندر مسافروں کے ساتھ پیش آنے والے مسائل پر گہری تشویش کا اظہار کیا۔
ممتاز تاجر جام خالد نے وفد کی نمائندگی کرتے ہوئے گورنر کو بتایا کہ تجارتی گاڑیوں کی نقل و حمل میں غیر ضروری رکاوٹوں کی وجہ سے دونوں صوبوں کے درمیان تجارت متاثر ہو رہی
ہے۔
انہوں نے مطالبہ کیا کہ تجارتی راستوں کو ہموار بنایا جائے اور مکران کے مسافروں کو کراچی میں بہتر سہولیات اور تحفظ فراہم کیا جائے۔
گورنر سندھ نے وفد کی جانب سے اٹھائے گئے مسائل کو سنجیدگی سے سنا اور ان کے فوری حل کے لیے بھرپور تعاون کی یقین دہانی کرائی۔
انہوں نے کہا کہ مکران کے عوام اور تاجروں کے مسائل کو حل کرنا ترجیحات میں شامل ہے اور اس سلسلے میں متعلقہ حکام کو ضروری احکامات جاری کیے جائیں گے تاکہ تجارتی
سرگرمیوں اور عوامی سفر میں کوئی رکاوٹ باقی نہ رہے
