20 کلو آٹے کے تھیلے کی قیمت بڑھ کر 2100 روپے تک جا پہنچی۔

آٹا مزید مہنگا ہو گیا
20 کلو آٹے کے تھیلے کی قیمت بڑھ کر 2100 روپے تک جا پہنچی

لاہور میں اوپن مارکیٹ میں سرکاری نرخ پر آٹے کی دستیابی تقریباً ختم ہو گئی ہے، جبکہ 10 اور 20 کلوگرام کے تھیلوں کی قیمتوں میں نمایاں اضافہ دیکھا گیا ہے۔

مارکیٹ ذرائع کے مطابق 10 کلو آٹے کا تھیلا 1050 روپے میں فروخت ہو رہا ہے جبکہ 20 کلو کا تھیلا 2100 روپے تک پہنچ چکا ہے۔ اس سے پہلے 10 کلو آٹے کی سرکاری قیمت 910 روپے اور 20 کلو کی 1810 روپے مقرر تھی۔

فلور ملز ایسوسی ایشن کے مطابق حکومت کی جانب سے سرکاری گندم کی فراہمی بند کیے جانے کے باعث آٹے کی قیمتوں میں اضافہ ہوا ہے۔

ادھر کریانہ مرچنٹس ایسوسی ایشن کا کہنا ہے کہ لاہور میں روزانہ تقریباً 2 لاکھ آٹے کے تھیلوں کی ضرورت ہوتی ہے، لیکن شہر سمیت پورے پنجاب میں سرکاری آٹا دستیاب نہیں رہا۔

پہلے فلور ملز سرکاری گندم حاصل کرکے 10 اور 20 کلو کے تھیلے سرکاری نرخ پر فراہم کرتی تھیں، مگر موجودہ حالات میں عوام کو آٹا مہنگے داموں خریدنا پڑ رہا ہے۔