بلوچستان اسمبلی: شہدائے پاک فوج کے لیے فاتحہ خوانی

کوئٹہ (بیورو رپورٹ) بلوچستان اسمبلی کا اہم اجلاس اسپیکر کی زیر صدارت جاری ہے جس میں ملک کی سالمیت کے لیے جانوں کا نذرانہ پیش کرنے والے پاک فوج کے شہداء کو خراجِ عقیدت پیش کیا گیا اور ان کے درجات کی بلندی کے لیے فاتحہ خوانی کی گئی۔
اجلاس کے دوران رکن صوبائی اسمبلی فرح عظیم شاہ نے خطاب کرتے ہوئے کہا کہ آج کے حالات میں ہمیں اپنی پاک فوج کے ساتھ مکمل یکجہتی کا اظہار کرنے کی ضرورت ہے۔ انہوں نے ایوان کے تمام ممبران پر زور دیا کہ”تمام اراکین اسمبلی کو چاہیے کہ وہ آج متحد ہو کر اپنی افواج کے حق میں بات کریں اور دشمن کے پروپیگنڈے کو ناکام بنائیں۔”
دوسری جانب، سینیئر پارلیمنٹیرین اور سابق وزیراعلیٰ بلوچستان نواب اسلم خان رئیسانی نے صوبائی حکومت کے بعض انتظامی فیصلوں پر سخت تنقید کی۔ انہوں نے اضلاع کی حدود میں تبدیلی اور ڈسٹرکٹس کو منتقل کرنے کے عمل پر بات کرتے ہوئے کہا کہ مختلف اضلا ع کو یہاں سے وہاں کرنے سے عوامی مسائل حل نہیں ہوں گے۔ بلکہ ایسے فیصلوں سے ہمارے درمیان فساد پیدا کرنے کی کوشش کی جا رہی ہے۔
انہوں نے کہا کہ وہ حکومت کے ان غیر منطقی فیصلوں کو کسی صورت قبول نہیں کریں گے۔
اجلاس میں دیگر اراکین نے صوبے کی مجموعی صورتحال اور عوامی مسائل پر بھی تبادلہ خیال کیا۔اس دوران اپوزیشن اور حکومتی اراکین کے درمیان بعض نکات پر جملہ بازی بھی دیکھنے میں آئی، تاہم شہداء کی قربانیوں پر پورا ایوان یک زبان نظر آیا۔