بنوں میں سیکیورٹی آپریشن، فتنہ الخوارج کے دو شدت پسند ہلاک

آئی ایس پی آر کے مطابق خیبرپختونخوا کے ضلع بنوں میں سیکیورٹی فورسز نے فتنہ الخوارج کے خلاف کارروائی کے دوران فائرنگ کے تبادلے میں بھارتی حمایت یافتہ دو خوارج کو ہلاک کر دیا۔

پاک فوج کے شعبہ تعلقات عامہ کے مطابق ہلاک ہونے والوں میں خوارجی کمانڈر وحید اللہ عرف مختیار اور ایک خودکش بمبار شامل ہیں۔ کارروائی کے دوران دہشت گردوں کے قبضے سے خودکش جیکٹ، اسلحہ اور گولہ بارود بھی برآمد کیا گیا۔

آئی ایس پی آر کا کہنا ہے کہ ہلاک ہونے والا خارجی وحید اللہ انتہائی مطلوب دہشت گردوں کی فہرست میں شامل تھا اور سیکیورٹی فورسز و عوام پر حملوں سمیت متعدد کارروائیوں میں ملوث رہا۔ وہ 21 فروری کو بنوں میں ہونے والے خودکش حملے کا ہینڈلر بھی تھا، جس میں لیفٹیننٹ کرنل گل فراز شہید ہوئے تھے۔ فورسز کی بروقت کارروائی نے ایک بڑے سانحے کو بھی ناکام بنایا۔

مزید بتایا گیا کہ اس آپریشن کے ذریعے مرکزی ملزم کو انجام تک پہنچا کر حملے کا بدلہ لے لیا گیا ہے، جبکہ علاقے میں دیگر خارجی عناصر کے خاتمے کے لیے کلیئرنس آپریشن جاری ہے۔ آئی ایس پی آر کے مطابق دہشت گردی کے خلاف کارروائیاں پوری شدت کے ساتھ جاری رہیں گی۔