وزیراعظم شہباز شریف کا خضدار میں شہید ہونے والی خاتون کانسٹیبل ملک ناز بلوچ کو خراجِ عقیدت

اسلام آباد (خبردار نیوز )‌ وزیراعظم محمد شہباز شریف نے خضدار میں دہشت گردوں کا مقابلہ کرتے ہوئے جامِ شہادت نوش کرنے والی بلوچستان پولیس کی بہادر خاتون کانسٹیبل ملک ناز بلوچ

کو خراجِ عقیدت پیش کیا ہے۔

وزیراعظم نے شہید کے درجات کی بلندی اور سوگوار خاندان کے لیے صبرِ جمیل کی دعا کی ہے۔

وزیراعظم نے اپنے بیان میں کہا کہ ملک ناز بلوچ بلوچستان کی پہلی پولیس کانسٹیبل تھیں جنہوں نے ارضِ وطن کی حفاظت کی خاطر اپنی جان کا نذرانہ پیش کر کے بہادری کی ایک نئی مثال

قائم کی ہے۔

 انہوں نے مزید کہاکہ”مجھ سمیت پوری قوم کو اپنی بہادر پولیس فورس اور ان کے حوصلوں پر فخر ہے، جنہوں نے ہمیشہ وطن کی سلامتی کو مقدم رکھا۔”

وزیراعظم شہباز شریف نے اس عزم کا اعادہ کیا کہ دہشت گردی کی عفریت کے ملک سے مکمل خاتمے تک یہ جنگ جاری رہے گی۔ انہوں نے کہا کہ ایسی قربانیاں ہمارے اس عزم کو مزید

تقویت دیتی ہیں کہ ہم دشمن کے ناپاک عزائم کو کبھی کامیاب نہیں ہونے دیں گے۔