قلعہ سیف اللہ: منشیات کے خلاف سیکیورٹی فورسز کا بڑا کریک ڈاؤن، 45 ایکڑ پر کھڑی پوست کی فصل تلف

کوئٹہ (بیورو رپورٹ) بلوچستان کے ضلع قلعہ سیف اللہ میں منشیات کی بیخ کنی کے لیے انتظامیہ اور سیکیورٹی فورسز نے ایک بڑی مشترکہ کارروائی کرتے ہوئے کروڑوں روپے مالیت کی پوست کی فصل کو تباہ کر دیا ہے۔
حکام کے مطابق یہ گرینڈ آپریشن قلعہ سیف اللہ کے علاقے بٹوزئی میں کیا گیا۔ آپریشن میں پولیس، محکمہ ایکسائز، اے این ایف (ANF) اور فرنٹیئر کور (FC) کی ٹیموں نے حصہ لیا۔ مشترکہ ٹیموں نے جدید حکمت عملی اپناتے ہوئے دشوار گزار علاقوں میں موجود پوست کی کاشت کو نشانہ بنایا۔
سرکاری ذرائع نے تصدیق کی ہے کہ مجموعی طور پر 45 ایکڑ رقبے پر پھیلی غیر قانونی فصل کو تلف کیا گیا ہے۔
تفصیلات کے مطابق پتلی بٹوزئی میں 25 ایکڑ پر موجود فصل کو ہل چلا کر اور دیگر طریقوں سے ختم کیا گیا۔اور نالیسر بٹوزئی میں 20 ایکڑ رقبے کو کلیئر کروا لیا گیا ہے۔
حکام کا کہنا ہے کہ پوست کی یہ کاشت غیر آباد اراضی پر کی گئی تھی اور حیران کن طور پر اس کی آبپاشی کے لیے ڈیم کا پانی استعمال کیا جا رہا تھا۔ مشترکہ ٹیموں نے مربوط انٹیلی جنس معلومات کی بنیاد پر کارروائی کی اور منشیات کے خاتمے کے حکومتی عزم کو عملی جامہ پہنایا۔
انتظامیہ نے دو ٹوک الفاظ میں پیغام دیا ہے کہ صوبے بھر خصوصاً سرحدی اضلاع میں منشیات کے خلاف مہم بلا امتیاز جاری رہے گی۔ حکام کا مزید کہنا تھا کہ “غیر قانونی سرگرمیوں میں ملوث عناصر کسی رعایت کے مستحق نہیں اور ان کے خلاف سخت قانونی کارروائی جاری رکھی جائے گی تاکہ معاشرے کو اس لعنت سے پاک کیا جا سکے۔”