اسلام آباد (نیوز ڈیسک)وفاقی وزیر داخلہ محسن نقوی نے “مارکہ حق” کی کامیابی کے جشن کے موقع پر قوم سے خطاب کرتے ہوئے انکشاف کیا ہے کہ حالیہ تنازع کے دوران پاکستانی ڈرونز
نے سرحد پار ناقابلِ یقین رسائی حاصل کی اور بھارتی وزیرِ اعظم کے سیکریٹریٹ کے اوپر پروازیں کرتے رہے۔
وزیر داخلہ نے اپنے بیان میں کہا کہ جنگ کے مشکل دنوں میں اللہ تعالیٰ کی غیبی مدد ہمارے شاملِ حال رہی، جس کا وہ خود گواہ ہیں۔
انہوں نے پاک فوج، پاک فضائیہ اور پاک بحریہ کے مشترکہ اور بہترین کردار کو سراہتے ہوئے کہا کہ تینوں مسلح افواج نے ایک مربوط حکمتِ عملی کے تحت دشمن کے دانت کھٹے کیے۔
محسن نقوی نے بتایا کہ بھارت نے پہلی بار پاکستان کے خلاف ڈرونز کا استعمال کیا، لیکن پاکستان نے نہ صرف اس کا بھرپور جواب دیا بلکہ ڈرون ٹیکنالوجی کا بہترین استعمال کر کے دشمن
کو حیران کر دیا۔
انہوں نے مزید کہاکہ”ہمارے ڈرونز بھارتی وزیر اعظم سیکریٹریٹ کے اوپر گھومتے رہے، جو ہماری تکنیکی برتری کا منہ بولتا ثبوت ہے۔”سائبر حملوں کے حوالے سے انہوں نے واضح کیا
کہ بھارت نے پاکستان کے ڈیجیٹل انفراسٹرکچر کو نقصان پہنچانے کی بھرپور کوشش کی، لیکن وہ ہمارے مضبوط سائبر دفاع کے قریب بھی نہیں پھٹک سکا۔
وزیر داخلہ نے بھارتی جارحیت کی مذمت کرتے ہوئے کہا کہ بھارت نے بزدلانہ کارروائیوں میں ہمارے سویلین شہریوں کو نشانہ بنا کر شہید کیا، جبکہ پاکستان نے اپنی اعلیٰ روایات کو برقرار
رکھتے ہوئے بھارت کے کسی سویلین کو ٹارگٹ نہیں کیا۔
انہوں نے قومی میڈیا کے کردار کی تعریف کرتے ہوئے کہا کہ پوری جنگ کے دوران میڈیا نے ملک میں اتحاد، یگانگت اور “ایک آواز” پیدا کرنے میں کلیدی کردار ادا کیا، جس سے دشمن کا
پراپیگنڈہ ناکام ہوا۔
