لبنان میں اسرائیلی جارحیت میں اضافہ، دو مختلف حملوں میں آٹھ شہری جاں بحق

لبنان میں اسرائیلی حملوں میں شدت آگئی، صیہونی فوج کی جانب سے دو مختلف مقامات پر کیے گئے حملوں میں آٹھ شہری جان کی بازی ہار گئے۔

عرب میڈیا کے مطابق جنوبی لبنان کے علاقے عدلون ہائی وے پر ایک گاڑی کو ڈرون حملے کا نشانہ بنایا گیا، جس کے نتیجے میں ایک ہی خاندان کے چھ افراد شہید ہوگئے، جن میں خواتین اور بچے بھی شامل تھے۔

ادھر شہر صور میں اسرائیلی بمباری سے مزید دو شہری شہید ہوئے، جس کے بعد جاں بحق افراد کی مجموعی تعداد آٹھ ہو گئی۔

دوسری جانب اطلاعات ہیں کہ حزب اللہ کے ساتھ جھڑپوں کے دوران ایک خاتون اسرائیلی فوجی ہلاک جبکہ دو اہلکار زخمی ہوئے ہیں۔

اسرائیلی حکام نے صورتحال کے پیش نظر شہر صور کے رہائشیوں کو فوری انخلا کی ہدایت بھی جاری کر دی ہے۔