ایٹم بم کی تیاری کے بعد ہر حکومت اور فوجی قیادت نے اس کی بھرپور حفاظت یقینی بنائی، حنیف عباسی۔

وفاقی وزیر ریلوے حنیف عباسی نے یومِ تکبیر کی تقریب سے خطاب کرتے ہوئے کہا کہ مسلم لیگ (ن) کے کارکن آج بھی پہلے کی طرح پارٹی کے ساتھ ڈٹے ہوئے ہیں۔ انہوں نے کہا کہ ن لیگ کو ماضی میں شدید سیاسی حملوں کا سامنا کرنا پڑا، بھائی کو بھائی اور کارکن کو کارکن سے لڑانے کی کوشش کی گئی، لیکن آج بھی عوام میاں نواز شریف کو اپنا قائد تسلیم کرتے ہیں۔ ان کا کہنا تھا کہ پاکستان کو آج دنیا بھر میں عزت و وقار کی نگاہ سے دیکھا جا رہا ہے۔

حنیف عباسی نے کہا کہ 1998 میں بھارت کے ایٹمی دھماکوں کے جواب میں پاکستان کو ایٹمی تجربات سے روکنے کی بھرپور کوشش کی گئی، یہاں تک کہ ہمارے قائد کو 5 ارب ڈالر تک کی پیشکش بھی کی گئی، مگر عالمی دباؤ کے باوجود پاکستان نے بھرپور جواب دیا اور دنیا نے ہماری طاقت دیکھی۔ انہوں نے کہا کہ ایٹم بم کی تیاری کے بعد ہر حکومت اور فوجی قیادت نے اس کی حفاظت کو یقینی بنایا۔

انہوں نے مزید کہا کہ ہم مشکل وقت میں پارٹی چھوڑ کر بھاگنے والوں میں سے نہیں۔ مجھے کہا گیا کہ پھانسی یا عمر قید ہو سکتی ہے، پارٹی چھوڑ دو، مگر میں نے جواب دیا کہ اٹک جیل سے میری لاش تو جا سکتی ہے لیکن میں پارٹی کا ساتھ نہیں چھوڑوں گا۔ ان کا کہنا تھا کہ ایک وقت ایسا بھی تھا جب ہر طرف اندھیرا نظر آتا تھا اور کبھی سوچا بھی نہیں تھا کہ وزیر بنوں گا، مگر آج پاکستان دنیا کے محفوظ ترین ممالک میں شمار ہوتا ہے۔ حنیف عباسی نے کہا کہ چینی وزیراعظم نے فیلڈ مارشل کا ہاتھ تھام کر پانچ منٹ تک پرتپاک استقبال کیا، جبکہ اگلا یومِ تکبیر راولپنڈی میں ہزاروں افراد کے اجتماع کے ساتھ منایا جائے گا۔