کوئٹہ ( خبر دار نیوز ) وزیر اعلیٰ بلوچستان میر سرفراز بگٹی کا چائلڈ لیبر ڈے پر پیغام میں کہا ہے کہ بچوں سے مشقت کے خلاف عالمی دن پر حکومت بلوچستان بچوں کے حقوق کے تحفظ اور روشن مستقبل کے لیے پرعزم ہے،
انہوں نے کہا کہ بچوں سے مزدوری ان کی تعلیم، صحت اور بہتر مستقبل کے مواقع سلب کرتی ہے،
انکے مطابق بلوچستان سے چار سو سے زائد مزدور بچوں کو معیاری تعلیم کے لئے اسکالر شپ پر ملک کے معیاری تعلیمی اداروں میں بھیجا جاررہا ہے، ہر بچے کو تعلیم، تحفظ اور ترقی کے مساوی مواقع فراہم کرنا ریاست کی ذمہ داری ہے،
وزیر اعلیٰ نے کہا کہ بلوچستان حکومت چائلڈ لیبر کے خاتمے کے لیے مؤثر اور عملی اقدامات جاری رکھے ہوئے ہے، بچوں کو مزدوری کے بجائے تعلیم کے زیور سے آراستہ کرنا خوشحال معاشرے کی بنیاد ہے،
میر سرفراز بگٹی کے مطابق والدین، اساتذہ اور سماجی ادارے بچوں کے استحصال کے خاتمے کے لیے مشترکہ کردار ادا کریں کیونکہ بچوں کا تحفظ اور فلاح و بہبود ہم سب کی مشترکہ ذمہ داری ہے،اور ہر بچے کو اپنے خواب پورے کرنے کے لیے محفوظ اور سازگار ماحول فراہم کرنا ہوگا،
