ڈیرہ بگٹی: غفلت برتنے پر 8 پولیس اہلکار ملازمت سے برخاست

ڈیرہ بگٹی (بیورو رپورٹ)
ڈیرہ بگٹی میں امن و امان کی صورتحال اور محکمہ پولیس میں تادیبی کارروائیوں کے حوالے سے اہم پیش رفت سامنے آئی ہے۔
ایس ایس پی ڈیرہ بگٹی نے فرائض میں غفلت اور لاپروائی برتنے پر سخت ایکشن لیتے ہوئے 8 پولیس اہلکاروں کو ملازمت سے برخاست کر دیا ہے،
جبکہ متعدد اہلکاروں کی سروس بھی ضبط کر لی گئی ہے۔ دوسری جانب ڈیرہ بگٹی اور سوئی میں قتل کے الگ الگ واقعات رپورٹ ہوئے ہیں۔
​پولیس ذرائع کے مطابق ایس ایس پی ڈیرہ بگٹی نے محکمانہ امور اور امن و امان کی ذمہ داریوں میں کوتاہی پر سخت موقف اپناتے ہوئے 8 پولیس اہلکاروں کو فوری طور پر نوکری سے فارغ کر دیا ہے۔
ملازمت سے برخاست ہونے والوں میں 2 ہیڈ کانسٹیبل اور 6 کانسٹیبل شامل ہیں۔
​علاوہ ازیں، فرائض میں غفلت کے مرتکب دیگر 10 پولیس اہلکاروں کے خلاف بھی سخت تادیبی کارروائی کی گئی ہے،
جس کے تحت ایک اسسٹنٹ سب انسپکٹر (ASI)، 2 ہیڈ کانسٹیبل اور 7 کانسٹیبلز کی ایک ایک سال کی سروس ضبط کر لی گئی ہے۔
پولیس حکام کا کہنا ہے کہ عوام کے جان و مال کے تحفظ میں کسی قسم کی سستی برداشت نہیں کی جائے گی اور احتساب کا یہ عمل جاری رہے گا۔
ادھر ڈیرہ بگٹی اور صنعتی شہر سوئی میں قتل کے افسوسناک واقعات پیش آئے ہیں جن میں قیمتی جانوں کا زیاں ہوا ہے۔
ان واقعات کے بعد متاثرہ علاقوں میں خوف و ہراس پھیل گیا ہے۔
پولیس نے لاشوں کو ہسپتال منتقل کرنے کے بعد واقعات کی تحقیقات اور ملزمان کی گرفتاری کے لیے چھاپے مارنا شروع کر دیے ہیں۔