ایرانی صدر کی اسلام آباد آمد: ریڈ زون کے بیشتر دفاتر میں ورک فرام ہوم کا اعلان

اسلام آباد (بیورو رپورٹ)ایرانی صدر کی دارالحکومت آمد پر سیکیورٹی اور انتظامی انتظامات کے پیشِ نظر خصوصی اقدامات کے تحت ریڈ زون کے بیشتر سرکاری دفاتر میں آج 23 جون کو “ورک فرام ہوم” (گھروں سے کام) کا اعلان کیا گیا ہے۔
کابینہ ڈویژن نے اس حوالے سے باضابطہ نوٹیفکیشن جاری کر دیا ہے،
جس کے تحت ریڈ زون میں واقع متعلقہ اداروں کے سرکاری ملازمین آج گھروں سے ہی اپنے فرائض انجام دیں گے۔
​نوٹیفکیشن کے مطابق اہم اور کلیدی نوعیت کے متعدد سرکاری اداروں کو اس فیصلے سے استثنیٰ حاصل ہو گا۔ کابینہ ڈویژن، فیڈرل بورڈ آف ریونیو (FBR)، فنانس ڈویژن اور وزارتِ خارجہ میں معمول کے مطابق کام کاج جاری رہے گا۔
اس کے علاوہ وزارتِ داخلہ، وزارتِ قانون اور وزارتِ تجارت کو بھی ورک فرام ہوم سے استثنیٰ دیا گیا ہے، جبکہ قومی اسمبلی، سینیٹ سیکریٹریٹ اور وزیراعظم آفس میں بھی دفتری سرگرمیاں حسبِ معمول بحال رہیں گی۔
​کابینہ ڈویژن نے واضح کیا ہے کہ جن اداروں کے ملازمین کو گھروں سے کام کرنے کی ہدایت کی گئی ہے، ان کے افسران اور عملہ بوقتِ ضرورت یا طلبی کی صورت میں فوری طور پر دفتر پہنچنے کے پابند ہوں گے۔ مزید برآں، اس نوٹیفکیشن کا اطلاق بینکوں پر نہیں ہوگا اور ریڈ زون میں واقع تمام بینک معمول کے مطابق کھلے رہیں گے۔