کوئٹہ (نمائندہ خصوصی) بلوچستان میں حالیہ مون سون بارشوں، طوفانی ہواؤں اور آسمانی بجلی گرنے کے باعث صوبے کے مختلف اضلاع میں جانی و مالی
نقصانات کی افسوسناک اطلاعات موصول ہوئی ہیں۔
پی ڈی ایم اے (پرووِنشل ڈیزاسٹر مینجمنٹ اتھارٹی) کی جانب سے جاری رپورٹ کے مطابق بارشوں سے مجموعی طور پر 7 افراد جاں بحق اور 7 زخمی ہو چکے
ہیں، جن میں خواتین اور بچے بھی شامل ہیں۔
پی ڈی ایم اے کے مطابق، شدید بارشوں اور سیلابی ریلوں کے نتیجے میں 22 مکانات کو نقصان پہنچا، جن میں سے 5 مکانات ضلع واشک میں مکمل طور پر منہدم
ہو گئے۔
واشک میں فلیش فلڈنگ کے باعث زرعی زمینوں کو بھی شدید نقصان پہنچا ہے۔
دوسری جانب لورالائی اور سوراب میں آنے والی طوفانی ہواؤں کے سبب متعدد سولر پینلز اور مکانات کو نقصان پہنچا ہے۔
موسیٰ خیل میں آسمانی بجلی گرنے کے نتیجے میں ایک شخص جاں بحق ہوا۔
پی ڈی ایم اے حکام کے مطابق، متاثرہ علاقوں میں ریسکیو اور امدادی سرگرمیاں جاری ہیں، جب کہ مزید نقصانات کا تخمینہ لگانے کے لیے سروے بھی جاری ہے۔
ضلعی انتظامیہ، مقامی ریسکیو ٹیموں کے ساتھ مل کر متاثرہ افراد کو فوری امداد فراہم کرنے میں مصروف ہے۔
محکمہ موسمیات نے آئندہ دنوں میں مزید بارشوں کی پیشگوئی کی ہے، جس کے پیش نظر عوام کو احتیاطی تدابیر اختیار کرنے کی ہدایت کی گئی ہے۔
