پیٹرولیم کی قیمتوں میں اضافے کے خلاف وکلاء کا عدالتی بائیکاٹ

کوئٹہ (نیوز رپورٹر)بلوچستان بار کونسل کی کال پر آج کوئٹہ سمیت صوبے بھر کی عدالتوں میں مکمل ہڑتال کی جا رہی ہے۔ وکلاء نے پیٹرول کی قیمتوں میں حالیہ اضافے اور بڑھتی ہوئی

مہنگائی کے خلاف احتجاجاً عدالتی کارروائیوں کا بائیکاٹ کر دیا ہے۔

بار کونسل کے نمائندوں کا کہنا ہے کہ مہنگائی کے طوفان سے جہاں عام عوام پریشان ہیں، وہاں وکلاء برادری بھی شدید متاثر ہو رہی ہے۔

انہوں نے حکومت سے مطالبہ کیا ہے کہ پیٹرولیم مصنوعات کی قیمتوں میں فوری کمی کی جائے اور مہنگائی پر قابو پانے کے لیے ہنگامی بنیادوں پر اقدامات کیے جائیں۔

وکلاء کی ہڑتال کے باعث عدالتوں میں زیر سماعت کیسز کی پیروی نہ ہو سکی، جس کی وجہ سے دور دراز علاقوں سے آنے والے سائلین کو شدید مشکلات کا سامنا کرنا پڑ رہا ہے۔

عدالتوں میں سناٹا رہا اور اہم مقدمات کی سماعتیں وکلاء کی عدم موجودگی کے باعث ملتوی کر دی گئیں۔