زیارت: بدترین لوڈشیڈنگ کے خلاف پہیہ جام ہڑتال، کوئٹہ شاہراہ بلاک

زیارت (خبردار نیوز ) وادی زیارت میں بجلی کی ناروا لوڈشیڈنگ اور کیسکو/واپڈا کی مبینہ نااہلی کے خلاف شہریوں نے بھرپور احتجاج کرتے ہوئے پہیہ جام ہڑتال کر دی ہے۔ احتجاج کے

باعث زیارت اور کوئٹہ کو ملانے والی مرکزی شاہراہ ٹریفک کے لیے مکمل طور پر بند ہوگئی ہے۔

مظاہرین نے پیچی ڈیم کے مقام پر رکاوٹیں کھڑی کر کے شاہراہ کو بلاک کر دیا، جس کی وجہ سے سڑک کے دونوں اطراف گاڑیوں کی لمبی لائنیں لگ گئیں۔

مظاہرین کا کہنا ہے کہ ضلعی ہیڈکوارٹر زیارت میں 13 گھنٹے جبکہ دیہی علاقوں میں 18 سے 21 گھنٹے تک بجلی غائب رہتی ہے، جس سے نظامِ زندگی مفلوج ہو کر رہ گیا ہے۔

شاہراہ کی بندش کے باعث اسکول جانے والے بچوں سمیت انٹرمیڈیٹ کا امتحان دینے والے طلبہ بھی پھنس کر رہ گئے، جس سے ان کا قیمتی تعلیمی وقت ضائع ہونے کا خدشہ ہے۔

مظاہرین نے الزام عائد کیا کہ واپڈا حکام کی من مانیاں عروج پر ہیں اور بار بار کی شکایات کے باوجود کوئی شنوائی نہیں ہو رہی۔ انہوں نے مطالبہ کیا کہ جب تک بجلی کا شیڈول بہتر نہیں بنایا

جاتا، احتجاج جاری رہے گا۔