ریاض( خبردار ڈیسک )سعودی عرب نے خیبر پختونخوا میں سکیورٹی چیک پوسٹ پر ہونے والے دہشت گرد حملے کی سخت الفاظ میں مذمت کرتے ہوئے اسے ایک “بزدلانہ اور غدارانہ”
کارروائی قرار دیا ہے۔ اس حملے میں متعدد پولیس اہلکار شہید اور کئی زخمی ہوئے ہیں۔
سعودی وزارتِ خارجہ کی جانب سے جاری کردہ باضابطہ بیان میں کہا گیا ہے کہ مملکتِ سعودی عرب اس افسوسناک واقعے پر حکومتِ پاکستان اور پاکستانی عوام کے ساتھ مکمل یکجہتی کا
اظہار کرتا ہے۔
بیان میں واضح کیا گیا کہ سعودی عرب ہر قسم کی دہشت گردی اور انتہاپسندی کو مکمل طور پر مسترد کرتا ہے، کیونکہ ایسی کارروائیاں پاکستان کے امن، استحکام اور سلامتی کو نقصان
پہنچانے کی ناکام کوشش ہیں۔
وزارتِ خارجہ نے حملے میں جان بحق ہونے والے شہداء کے اہل خانہ سے دلی تعزیت اور ہمدردی کا اظہار کیا ہے۔
اعلامیے کے آخر میں شہداء کے درجات کی بلندی اور واقعے میں زخمی ہونے والے اہلکاروں کی جلد اور مکمل صحتیابی کے لیے نیک تمناؤں کا اظہار اور دعا بھی کی گئی ہے۔
