کوئٹہ،( خبردار نیوز ) وزیراعلیٰ بلوچستان میر سرفراز بگٹی نے ضلع کیچ کے علاقے میناز (بولیدہ) میں سیکیورٹی فورسز کی جانب سے “آپریشن ردالفتنہ 3” کے تحت فتنہ الہندوستان کے دہشت گردوں کے خلاف کی جانے والی کامیاب کارروائی پر گہرے اظہارِ اطمینان کا اظہار کیا ہے۔
اس موقع پر اپنے ایک بیان میں وزیراعلیٰ میر سرفراز بگٹی نے مندرجہ ذیل اہم نکات پر روشنی ڈالی اور کہا کہ آپریشن ردالفتنہ 3 کے تحت دہشت گردوں کے خلاف یہ مؤثر کارروائیاں امن دشمن عناصر کے تمام مذموم عزائم کو خاک میں ملانے کے لیے انتہائی ناگزیر ہیں۔
وزیراعلی کے مطابق میناز، بولیدہ میں انٹیلی جنس بیسڈ آپریشن کے دوران فتنہ الہندوستان کے ایک دہشت گرد کو جہنم واصل کرنا سیکیورٹی فورسز کی ایک اور بڑی اور اہم کامیابی ہے۔
جبکہ دو معصوم خواتین کو اپنے ہمراہ ڈھال بنا کر لے جانے والے دہشت گردوں کے خلاف سیکیورٹی فورسز کی جانب سے بروقت اور بہادرانہ کارروائی ان کی اعلیٰ مستعدی اور پیشہ ورانہ صلاحیتوں کا منہ بولتا ثبوت ہے۔
انہوں نے کہا کہ بلوچستان میں مستقل امن و امان کے قیام اور عوام کی جان و مال کے تحفظ کو یقینی بنانے کے لیے سیکیورٹی فورسز کی قربانیاں اور خدمات پوری قوم کے لیے قابلِ تحسین ہیں۔
وزیراعلیٰ نے دوٹوک الفاظ میں عزم ظاہر کیا کہ فتنہ الہندوستان کے دہشت گردوں اور ان کے تمام اندرونی و بیرونی سہولت کاروں کے خلاف یہ کارروائیاں اس وقت تک پوری قوت کے ساتھ جاری رہیں گی جب تک آخری دہشت گرد کا صفایا نہیں ہو جاتا۔
