فیفا ورلڈ کپ؛ ایرانی فٹبال ٹیم کا لاس اینجلس کے نام الوداعی امن اور دوستی کا پیغام

لاس اینجلس (نیوز ڈیسک)فیفا ورلڈ کپ میں بیلجیم کے خلاف اہم میچ بغیر کسی گول کے ڈرا ہونے کے بعد ایرانی فٹبال ٹیم نے اپنے منفرد اور شاندار رویے سے سب کے دل جیت لیے۔
عالمی خبر رساں ادارے ‘رائٹرز’ کے مطابق ایرانی ٹیم نے لاس اینجلس اسٹیڈیم کا ڈریسنگ روم چھوڑنے سے قبل میزبان شہر کے نام ایک خصوصی شکریہ نوٹ چھوڑا۔
ایرانی فٹبال ٹیم نے اپنے اس پیغام میں لاس اینجلس کی شاندار مہمان نوازی کی کھل کر تعریف کی۔ ٹیم کی جانب سے لکھے گئے نوٹ میں کہا گیا، “ہم فخر کے ساتھ آئے، عزت کے ساتھ مقابلہ کیا اور وقار کے ساتھ واپس جا رہے ہیں۔
اس نوٹ میں جہاں میچ کے دوران بھرپور سپورٹ کرنے پر ایرانی شائقین کا شکریہ ادا کیا گیا، وہیں دنیا بھر کی تمام اقوام کے درمیان امن، احترام اور دوستی کا ایک مثبت پیغام بھی دیا گیا۔ دلچسپ بات یہ ہے کہ اس شکریہ نوٹ میں ‘میناب 168’ بھی تحریر تھا جو توجہ کا مرکز بنا ہوا ہے۔
واضح رہے کہ بیلجیم جیسی مضبوط ٹیم کے خلاف میچ صفر صفر سے ڈرا ہونے کے بعد، ایرانی ٹیم ورلڈ کپ کے ناک آؤٹ مرحلے تک رسائی حاصل کرنے کی دوڑ میں بدستور شامل ہے اور اس کی امیدیں مضبوط ہیں۔