لوئر دیرمیں سی ٹی ڈی اور پولیس کا بڑا ایکشن، 6 انتہائی مطلوب دہشت گرد ہلاک،

​پشاور ( مانیٹرنگ ڈیسک) دیر لوئر کے علاقے میں کاؤنٹر ٹیررازم ڈیپارٹمنٹ (سی ٹی ڈی) اور پولیس نے مشترکہ گرینڈ آپریشن کرتے ہوئے 6 انتہائی مطلوب دہشت گردوں کو ہلاک کر دیا ہے۔
سی ٹی ڈی حکام کے مطابق ہلاک ہونے والے دہشت گرد گزشتہ دنوں چیک پوسٹ پر ہونے والے حملے اور کانسٹیبل کی شہادت کے واقعات میں براہِ راست ملوث تھے۔ آپریشن کے دوران دہشت گردوں کے قبضے سے 6 کلاشنکوف اور 3 ہینڈ گرینیڈ بھی برآمد کر لیے گئے ہیں،
جبکہ موقع سے فرار ہونے والے دیگر دہشت گردوں کی گرفتاری کے لیے علاقے میں بڑے پیمانے پر سرچ آپریشن جاری ہے۔
​دوسری جانب وفاقی وزیر داخلہ محسن نقوی، آئی جی پی خیبر پختونخوا اور ایڈیشنل آئی جی سی ٹی ڈی نے اس کامیاب آپریشن پر فورسز کو زبردست الفاظ میں خراجِ تحسین پیش کیا ہے۔
وفاقی وزیر داخلہ محسن نقوی کا کہنا تھا کہ سی ٹی ڈی اور پولیس کے بہادر سپوتوں نے خوارجیوں کے ناپاک عزائم کو خاک میں ملا دیا ہے اور قوم کو اپنے جوانوں پر فخر ہے۔
آئی جی پی خیبر پختونخوا نے عزم کا اظہار کیا کہ جب تک صوبے سے دہشت گردی کا مکمل خاتمہ نہیں ہو جاتا، یہ ٹارگٹڈ آپریشنز اسی طرح جاری رہیں گے