وفاقی آئینی عدالت کی کوئٹہ رجسٹری میں مقدمات کی سماعت شروع

کوئٹہ (بیورو رپورٹ): وفاقی آئینی عدالت کے معزز جج، جناب جسٹس روزی خان بڑیچ نے وکلاء سے خطاب کرتے ہوئے کہا ہے کہ آئینی عدالت نے کوئٹہ میں اپنی رجسٹری قائم کر کے مقدمات کی باقاعدہ سماعت کا آغاز کر دیا ہے۔
انہوں نے واضح کیا کہ عدالت عوام کی سفری مشکلات کو مدنظر رکھتے ہوئے یہاں پہنچی ہے کیونکہ غریب سائلین کے لیے ڈیڑھ لاکھ روپے کا ہوائی ٹکٹ خرید کر اسلام آباد جانا ممکن نہیں ہے۔
​جسٹس روزی خان بڑیچ نے یقین دہانی کرائی کہ سائلین کو ان کی دہلیز پر سستا انصاف فراہم کرنے کے لیے وہ ہر ماہ خود کوئٹہ آکر مقدمات کی سماعت کریں گے
اور اس عمل میں وفاقی عدالت اور وکلاء کے درمیان مضبوط رابطہ برقرار رہے گا۔
​اس موقع پر وکلاء رہنما عطاء اللہ لانگو ایڈوکیٹ نے گفتگو کرتے ہوئے آئینی عدالت کے ججز کی آمد کا خیرمقدم کیا اور کہا کہ ججز کا یہاں آنا غریب عوام کو سستا انصاف فراہم کرنے کی جانب بڑا قدم ہے۔
انہوں نے تجویز دی کہ اگر آئینی عدالت ہر ماہ باقاعدگی سے یہاں مقدمات کی سماعت کرے تو اس سے سائلین کو انتہائی ریلیف ملے گا۔