لاہور ( خبردار اسپورٹس ) پاکستان کرکٹ بورڈ (پی سی بی) نے ملک میں انٹرنیشنل کرکٹ کی سرگرمیوں کو حتمی شکل دینے کے لیے کوششیں تیز کر دی ہیں۔
ذرائع کے مطابق، پاک-آسٹریلیا ون ڈے سیریز کے شیڈول کے حوالے سے پی سی بی کو اب کرکٹ آسٹریلیا کے حتمی جواب کا انتظار ہے۔
پی سی بی نے تجویز دی ہے کہ ون ڈے سیریز کے تمام میچز لاہور میں منعقد کیے جائیں۔ سیریز کے لیے 31 مئی، 2 جون اور 4 جون کی تاریخیں تجویز کی گئی ہیں۔ کرکٹ آسٹریلیا سے گرین
سگنل ملتے ہی شیڈول کا باقاعدہ اعلان کر دیا جائے گا۔
پاکستان، انگلینڈ اور سری لنکا کے درمیان ون ڈے سیریز کے حوالے سے بھی بڑی پیش رفت ہوئی ہے۔ ذرائع کا کہنا ہے کہ تینوں کرکٹ بورڈز سیریز کھیلنے پر متفق ہو گئے ہیں، جو رواں
سال اکتوبر کے آخری ہفتے میں متوقع ہے۔
اس ٹرائی نیشن سیریز کے لیے فی الحال وینیوز کو حتمی شکل دی جا رہی ہے، جس کے بعد متعلقہ بورڈز کے ساتھ شیڈول شیئر کیا جائے گا۔
مزید برآں، سری لنکن ٹیم اپنے دورہ پاکستان کے دوران محض ون ڈے ہی نہیں بلکہ دو ٹیسٹ اور تین ٹی ٹوئنٹی میچز بھی کھیلے گی۔
ان تمام سیریز کا باقاعدہ اعلان بورڈز کی باہمی مشاورت مکمل ہونے کے بعد کیا جائے گا۔
